అధిక వడ్డీల ఆశ చూపి డిపాజిట్ల సేకరణ పేరుతో జరుగుతున్న మోసాల పట్ల ప్రజలు అప్రమత్తంగా ఉండాలి.

డిపాజిట్ పై వారానికి 10 శాతం, నెలకు 40 శాతం వడ్డీ ఇస్తామనే హామీలను నమ్మవద్దు.
అత్యాశకు లోనై కష్టార్జిత సొమ్మును కోల్పోవద్దు – జిల్లా ఎస్పీ కె. నరసింహ ఐపీఎస్.
సూర్యాపేట:- సూర్యాపేట జిల్లా ప్రజలు అధిక వడ్డీలు చెల్లిస్తామనే ఆకర్షణీయమైన హామీలతో జరుగుతున్న ఆర్థిక మోసాల పట్ల అప్రమత్తంగా ఉండాలని జిల్లా ఎస్పీ కె. నరసింహ ఐపీఎస్ సూచించారు. తక్కువ సమయంలో ఎక్కువ ఆదాయం వస్తుందనే ఆశతో ఎలాంటి విచారణ లేకుండా వ్యక్తులు లేదా సంస్థల వద్ద డబ్బులు డిపాజిట్ చేసి తమ కష్టార్జిత సంపాదనను కోల్పోవద్దని హెచ్చరించారు.
జిల్లాలో కొంతమంది వ్యక్తులు ప్రజలకు అసాధారణమైన అధిక వడ్డీలు చెల్లిస్తామంటూ ఆశ చూపి, వారి నుంచి భారీ మొత్తంలో డిపాజిట్లు సేకరిస్తున్నట్లు పోలీస్ శాఖ దృష్టికి వచ్చిందని ఎస్పీ తెలిపారు. ముఖ్యంగా రూ.10,000 డిపాజిట్ చేస్తే ప్రతి వారం రూ.1,000 వడ్డీ చెల్లిస్తామని, అంటే వారానికి 10 శాతం, నెలకు సుమారు 40 శాతం వడ్డీ వస్తుందని ప్రచారం చేస్తూ ప్రజలను ఆకర్షిస్తున్నట్లు సమాచారం ఉందన్నారు. ఇలాంటి అసాధారణమైన వడ్డీ హామీల వెనుక మోసపూరిత ఉద్దేశాలు ఉండే అవకాశం ఉందని పేర్కొన్నారు. మొదట్లో కొంతమందికి వడ్డీ చెల్లిస్తూ నమ్మకం కలిగించి, ఆ తర్వాత మరింత ఎక్కువ మొత్తంలో ప్రజల నుంచి డబ్బులు సేకరించి, చివరకు చెల్లింపులు నిలిపివేసి నిర్వాహకులు పరారయ్యే ప్రమాదం ఉందని హెచ్చరించారు. ఇలాంటి మోసాల వల్ల సామాన్య, మధ్యతరగతి కుటుంబాలు తీవ్రంగా నష్టపోయే అవకాశం ఉందని తెలిపారు.
ప్రజలు తప్పనిసరిగా పాటించాల్సిన జాగ్రత్తలు:
1. అధిక వడ్డీలు ఇస్తామని చెప్పే వ్యక్తులు లేదా సంస్థల వద్ద ఎలాంటి విచారణ లేకుండా డబ్బులు డిపాజిట్ చేయవద్దు.
2. సంస్థకు చట్టబద్ధమైన రిజిస్ట్రేషన్, అనుమతులు ఉన్నాయో లేదో పరిశీలించాలి.
3. వ్యక్తిగత బ్యాంకు ఖాతాలకు లేదా అనధికారిక సంస్థలకు పెద్ద మొత్తంలో నగదు బదిలీ చేయవద్దు.
4. బంధువులు, స్నేహితులు, పరిచయస్తులు చెప్పినప్పటికీ పూర్తిస్థాయిలో ధృవీకరించకుండా పెట్టుబడులు పెట్టవద్దు.
5. అధిక లాభాల ఆశతో అప్పులు చేసి లేదా ఆస్తులు విక్రయించి డబ్బులు పెట్టవద్దు.
6. అనుమానాస్పద డిపాజిట్ సేకరణ కార్యకలాపాలు మీ దృష్టికి వస్తే వెంటనే పోలీసులకు సమాచారం అందించాలి.
చట్టపరమైన హెచ్చరిక:
రిజర్వ్ బ్యాంక్ ఆఫ్ ఇండియా (RBI), కేంద్ర మరియు రాష్ట్ర ప్రభుత్వాల నిబంధనల ప్రకారం ప్రజల నుంచి డిపాజిట్లు సేకరించడానికి సంబంధిత చట్టబద్ధమైన అర్హతలు, అనుమతులు ఉండాలని ఎస్పీ తెలిపారు. ప్రతి వ్యక్తి లేదా సంస్థ ప్రజల నుంచి ఇష్టానుసారంగా డిపాజిట్లు సేకరించడానికి అనుమతి లేదని, అనధికారికంగా డిపాజిట్లు సేకరించడం, తప్పుడు హామీలతో ప్రజలను మోసం చేయడం చట్టరీత్యా నేరమని స్పష్టం చేశారు. ఇలాంటి కార్యకలాపాలకు పాల్పడే వారిపై సంబంధిత చట్టాల ప్రకారం కఠిన చర్యలు తీసుకుంటామని హెచ్చరించారు.
బాధితులు వెంటనే పోలీసులకు ఫిర్యాదు చేయాలి:
ఇప్పటికే ఇలాంటి పథకాలలో డబ్బులు పెట్టి మోసపోయిన బాధితులు ఎవరైనా ఉంటే భయపడకుండా వెంటనే సమీప పోలీస్ స్టేషన్‌లో ఫిర్యాదు చేయాలని ఎస్పీ సూచించారు. డబ్బులు చెల్లించిన రసీదులు, బ్యాంకు లావాదేవీల వివరాలు, వాట్సాప్ సందేశాలు, ఇతర ఆధారాలను పోలీసులకు అందించాలని కోరారు. ఇలాంటి మోసపూరిత కార్యకలాపాలకు సంబంధించిన సమాచారం తెలిసిన వారు కూడా పోలీసులకు తెలియజేయాలని విజ్ఞప్తి చేశారు.
ప్రజలు తమ కుటుంబ సభ్యులు, బంధువులు, స్నేహితులు మరియు పరిచయస్తులను కూడా ఇలాంటి ఆర్థిక మోసాల పట్ల అప్రమత్తం చేయాలని ఎస్పీ కోరారు. అత్యాశకు లోనై జీవితకాల కష్టార్జిత సంపాదనను కోల్పోవద్దని, ప్రజల సహకారంతోనే ఆర్థిక నేరాలను సమర్థవంతంగా అరికట్టగలమని తెలిపారు.
ప్రజల ఆర్థిక భద్రతే పోలీస్ శాఖ ప్రాధాన్యత. ప్రజల అప్రమత్తతే ఆర్థిక మోసాలకు అడ్డుకట్ట అని జిల్లా ఎస్పీ కె. నరసింహ ఐపీఎస్ పేర్కొన్నారు.