ఓట్ల చోరీ ఆరోపణలపై జ్ఞానేష్ కుమార్‌ను అరెస్టు చేయాలి
Suryapet Town:-ఓట్ల చోరీకి సంబంధించిన ఆరోపణలపై జ్ఞానేష్ కుమార్‌ను వెంటనే అరెస్టు చేసి, సమగ్ర విచారణ జరిపించాలని వ్యవసాయ మార్కెట్ కమిటీ చైర్మన్ కొప్పుల వేణారెడ్డి డిమాండ్ చేశారు. సూర్యాపేట జిల్లా కేంద్రంలోని తెలంగాణ తల్లి విగ్రహం వద్ద బీజేపీ అనుకూల ఏకపక్ష వైఖరిని నిరసిస్తూ జ్ఞానేష్ కుమార్ దిష్టిబొమ్మను దహనం చేశారు. ఈ సందర్భంగా కొప్పుల వేణారెడ్డి మాట్లాడుతూ.. ఓట్ల చోరీకి సంబంధించిన ఆరోపణలపై సమగ్ర దర్యాప్తు నిర్వహించి వాస్తవాలను ప్రజల ముందుంచాలని కోరారు. ప్రజాస్వామ్యంలో ఓటు హక్కు అత్యంత కీలకమైనదని, ఓటర్ల హక్కులకు భంగం కలిగించే ఎలాంటి చర్యలైనా ప్రజాస్వామ్య స్ఫూర్తికి విరుద్ధమని అన్నారు. ఓట్ల వ్యవహారంపై అనుమానాలు, ఆరోపణలు వెలువడిన నేపథ్యంలో ఎన్నికల అధికారులు, సంబంధిత దర్యాప్తు సంస్థలు నిష్పక్షపాతంగా విచారణ చేపట్టాలని కోరారు. ఎన్నికల ప్రక్రియపై ప్రజల్లో నమ్మకం, విశ్వాసం మరింత బలోపేతం అయ్యేలా అధికారులు పారదర్శకంగా వ్యవహరించాల్సిన అవసరం ఉందన్నారు. ఓటర్ల హక్కులను కాపాడేందుకు ప్రజాస్వామ్యవాదులు, రాజకీయ పార్టీలు బాధ్యతగా వ్యవహరించాలని సూచించారు. ఓట్ల వ్యవహారంలో ఆరోపణలు ఎదుర్కొంటున్న వారిపై చట్టప్రకారం సమగ్ర విచారణ జరిపి, వాస్తవాలు తేలిన అనంతరం తగిన చర్యలు తీసుకోవాలని కొప్పుల వేణారెడ్డి డిమాండ్ చేశారు.